Bankastjórar með tvöföld laun forsætisráðherra

Bankastjórar fjögurra stærstu viðskiptabankanna höfðu í fyrra allir hærri laun en forsætisráðherra landsins þrátt fyrir stefnu stjórnvalda um að engir starfsmenn á vegum ríksins hafi hærri laun en forystumaður ríkisstjórnarinnar.

Af fjórmenningunum hafði Ragnar Z. Guðjónsson, þáverandi bankastjóri hjá Byr, hæstu mánaðarlaunin á árinu 2010 ef marka má álagningarskrár skattayfirvalda. Samkvæmt þeim námu mánaðarlaun Ragnars 2.154.576 krónum.

Næstur Ragnari í launum í fyrra var Ásmundur Stefánsson, þáverandi bankastjóri Landsbankans, sem fékk 2.000.877 krónur á mánuði.

Á eftir Ásmundi fylgir Finnur Sveinbjörnsson, þáverandi bankastjóri Arion banka sem fékk 1.736.657 krónur á mánuði á árinu 2010.

Síðust í þessum hópi er Birna Einarsdóttir, bankastjóri Íslandsbanka, sem hafði 1.661.697 krónur í mánaðarlaun.

Af þessum fjórum er Birna Einarsdóttir sú eina sem enn er bankastjóri. Þess má jafnframt geta að Íslandsbanki er sá eini af þessum bankastofnununum sem eru ekki enn í eigu ríkisins.

Mánaðarlaun Jóhönnu Sigurðardóttur forsætisráðherra námu samkvæmt álagningarskránni 1.076.011 krónum í fyrra. - gar