Frítt að leggja við Landeyjahöfn

„Það er hætt að rukka fyrir bílana, það þarf enginn að borga fyrir bílastæði," segir Sigmar Jónsson, hafnarstjóri Landeyjahafnar. Siglingamálstofnun ákvað að rukka þá sem geyma bíla sína við höfnina yfir helgina um 1.000 krónur. Sú ákvörðun var dregin til baka.

„Það var Siglingastofnun sem ákvað þetta gjald. Ég hef svo heyrt að það hafi ekki verið lögmætt, það er segja ekki leyfilegt að gera þetta svona," segir Sigmar en einhverjir voru búnir að borga gjaldið sem eru nú þegar komnir til eyjarinnar. Hann segir að þeir sem hafi verið búnir að borga fyrir bílastæðin fái endurgreitt. „Já, ég hef ekki trú á öðru en að þeim verði endurgreitt."

Mikið af fólki hefur farið í gegnum höfnina og er nóg að gera. „Þetta er þessi hefðbundni aldur, en allir hafa verið stilltir og prúðir. Fólk er að fara á þjóðhátíð til að skemmta sér og því eru allir í góðu skapi." Veðrið við höfnina þessa stundina er heldur leiðinlegt segir Sigmar, örlítil rigning og mikill vindur. Það tekur Herjólf 32-35 mínútur að sigla milli lands og eyja og því mun þetta ganga hratt fyrir sig.

Fréttastofa hefur fengið fyrirspurnir að því að gúmmíbátar hafi verið að stelast inn í höfnina og sigla yfir. Sigmar segir það ekki rétt. „Ég hef ekki orðið var við það, ég er búinn að vera hérna dag og nótt síðan höfnin opnaði. Og auk þess held ég að það væri ekkert hægt miðað við veðrið núna."