Geysissvæðið olnbogabarn í kerfinu

Landsspilda ríkisins á Geysissvæðinu í Haukadal, virðist vera einskonar olnbogabarn, því engin ríkisstofnun eða ráðuneyti telja svæðið á sínu forræði og þar með ber engin ábyrgð á ástandi þess.

Umræða um öryggismál á svæðinu hefur vaknað eftir að tveggja ára spænsk stúlka brenndist alvarlega í fyrradag þegar hún féll framfyrir sig ofan í afrennsli frá hvernum Strokki. Strangt til tekið eiga allar jarðir í eigu ríkisins að vera á forræði landbúnaðarráðuneytisins, en Geysissvæðið er það ekki.

Upp úr miðri síðustu öld var til svonefnd Geysisnefnd, með aðkomu menntamálaráðuneytisins, en nefndin er ekki lengur til. Svæðið er heldur ekki á forræði umhverfisráðuneytis, né umhverfisstofnunar og fréttastofunni tókst ekki fyrir fréttir að grafa upp nefnd, sem embættismenn segja að sé hugsanlega enn til, og eigi að fjalla um málefni Geysissvæðisins.

Að minnstakosti kannast embættismenn ekki við að neitt hafi komið frá henni. Eins og við greindum frá í hádegisfréttum í gær, hefur sveitarfélagið Bláskógabyggð haft frumkvæði að því að reyna að koma einhverju skikki á málefni Geysissvæðisins, í samvinnu við Umhverfisstofnun, en þó án þes að svæðið sé á forræði stofnunarinnar og engir fjármunir séu tiltækir til framkvæmda.

Meðal hugmynda sem nú eru ræddar eru að stækka svæðið, friðlýsa það og bæta og treysta aðgengi að því, en á þessu stigi virðist þetta þó aðeins vera óskalisti.