Lundaholur sviðnuðu í Vigur

Yfir þrjátíu slökkviliðsmönnum tókst í gærkvöld að slökkva mikinn bruna sem kraumaði í jarðvegi í eynni Vigur í Ísafjarðardjúpi.

Heimamenn kveiktu í sinu á mánudaginn. Í fyrradag kom í ljós að enn var mikill eldur í sverðinum. Gerði það slökkviliðsmönnum erfitt um vik að eldurinn læsti sig í lundaholur. Slökkviliðsmenn komu frá Ísafirði, Súðavík og Bolungarvík.

„Þetta var ekki sinubruni heldur var þetta mór sem sveið undir öllu. Það má eiginlega segja að þetta hafi verið eins og kol að brenna og það þurfti gífurlegt vatnsmagn til að slökkva í þessu,“ sagði Hlynur Karlsson, slökkviliðsstjóri í Súðavík. „Við vonum að þetta sé komið en það verður vakt á þessu í nótt,“ bætti hann við.

Hlynur sagði ábúendur í Vigur telja að þótt nokkrar lundaholur hafi skemmst í slökkvistarfinu hafi tjón ekki orðið mikið enda sé varp ekki byrjað hjá lundanum þótt það hefjist fljótlega. „Ég held að þetta eigi ekki eftir að hafa áhrif á lífið í eyjunni,“ sagði slökkviliðsstjórinn. - gar