Lokatónleikar Jónsa í Höllinni

Tónlistarmaðurinn Jón Þór Birgisson, eða Jónsi úr Sigur Rós, lýkur heimstónleikaferðalagi sínu á Íslandi í Laugardalshöllinni 29. desember.

Í byrjun apríl gaf Jónsi út sína fyrstu sólóplötu, Go, sem hefur hlotið lof gagnrýnenda um allan heim. Í kjölfar útgáfu plötunnar lagði Jónsi af stað í metnaðarfulla tónleikaferð um heiminn sem stendur enn yfir. Áður en Jónsi stígur á svið í Laugardalshöllinni mun hann ásamt hljómsveit hafa spilað á einum 99 tónleikum í Norður-Ameríku, Evrópu, Ástralíu og Asíu, þar á meðal tónlistarhátíðunum Coachella, Summer Sonic, Öya, Pukkelpop, Electric Picnic og Bestival.

Tónleikaferðin hefur vakið mikla eftirtekt enda hefur Jónsi ferðast um með afar vandaða sviðsmynd. Jónsi leitaði til framleiðslufyrirtækisins 59 Productions og ljósahönnuðarins Phil Eddolls í London við hönnun hennar. 59 Productions hafa m.a. unnið fyrir ensku óperuna, enska þjóðleikhúsið, Metropolitan-óperuna í New York og listahátíðir í Evrópu.

Forsala á tónleika Jónsa hefst á fimmtudaginn kl. 10.00 á Midi.is og afgreiðslustöðum Mida.is. Jónsi hefur ákveðið að gefa 300 unglingum á aldrinum 13 til 16 ára tækifæri til að komast á tónleikana á miðaverði sem þeir ráða við, eða 1.000 kr. Annars kostar miðinn 3.900 og 4.900 krónur.