Ómar fékk heiðursverðlaun Pokasjóðs

Fimmtíu milljónum króna var í gær úthlutað úr Pokasjóði. Alls 55 verkefni á sviði umhverfismála, menningar, mannúðar, íþrótta og útivistar fengu úthlutað úr sjóðnum að þessu sinni. Eftir úthlutunina í gær hefur einum milljarði króna nú verið úthlutað úr sjóðnum frá því hann tók til starfa árið 1995.

Hæsta styrkinn, fimm milljónir króna, hlutu Útivist og Ferðafélag Íslands til öskuhreinsunar í Þórsmörk eftir eldgos í vor. Vímulaus æska hlaut fjögurra milljóna styrk til að halda sjálfstyrkingarnámskeið fyrir börn. UMFÍ og Landgræðslufélag Biskupstungna fengu þrjár milljónir hvort, til undirbúnings hreinsunarátaks og uppgræðslu á Haukadalsheiði. Meðal annarra verkefna sem fengu háa styrki voru framkvæmdir í Esjuhlíðum, gerð heimildarmyndar um Gjástykki og sumarbúðir fatlaðra á Laugarvatni. Þá fékk Samhjálp hálfa milljón króna til að kaupa mat handa skjólstæðingum sínum.

Ómari Ragnarssyni voru veitt Umhverfisverðlaun UMFÍ og Pokasjóðs fyrir óeigingjarnt og ötult starf í þágu íslenskrar náttúru. Hann tók við verðlaununum á Kaffi Nauthól í Nauthólsvík, þar sem úthlutunin fór einnig fram.

Það eru 160 verslanir á Íslandi sem standa að Pokasjóði, en hann fær allar tekjur sínar af sölu plastpoka í verslununum.