Íhugar að blása flugeldasýninguna á Menningarnótt af

Hugsanlega verður engin flugeldasýning á Menningarnótt í ár en Jón Gnarr borgarstjóri íhugar nú að blása sýninguna af. Með því myndu um þrjár milljónir sparast.

Menningarnótt fer fram laugardaginn 21. ágúst. Í dagbókarfærslu á Fésbókinni í gærkvöldi skrifaði Jón: „Hér er smá vandamál sem ég veit ekki alveg hvernig ég á að tækla: Á Orkuveitan að vera með þriggja milljón króna flugeldasýningu á Menningarnótt eins og venjulega? Er það bruðl? Er skrum að sleppa því? Er þetta smámál eða stórmál?"

Viðbrögðin láta ekki sér standa og höfðu yfir 450 svarað á tíunda tímanum í morgun. Sitt sýnist hverjum og eru margir hlynntir því að flugeldasýningin verði blásin af þar sem hún sé bruðl og þá eru fjölmargir sem vilja að sýningin verði með hefðbundnu sniði í ár. Þá hafa nokkrir stungið upp á því að minni fjármunum verði varið í flugeldasýninguna í þetta sinn.

Dagbók borgarstjóra er hægt að skoða hér.