Viðrar vel til útileguferða

Veðurútlit fyrir helgina er mjög gott og hefur farið batnandi eftir því sem nær hefur dregið helginni, segir Elísabet Margeirsdóttir, veðurfréttamaður á 365 miðlum. Hún segir að veðurútlit á mánudag sé jafnframt mun betra en það var. „Það verður minni úrkoma en gert hafði verið ráð fyrir og vindur verður alveg í lágmarki framyfir verslunarmannahelgina. Það verður hæg breytileg átt og sumsstaðar hafgola," segir Elísabet.

Elísabet segir að mest óvissa hafi ríkt um skýjafarið en nú líti út fyrir að það verði bjartara en spáð var í fyrstu, sérstaklega á sunnudag. „Á sunnudag verður líklegast bjart um allt land, síst þó austantil. Á mánudag dregur fyrir vestantil á landinu og horfur eru á lítisháttar vætu norðvestan og vestantil," segir Elísabet. Hún segir að það hafi dregið úr líkum á síðdegisskúrum um helgina en þó sé nánast hvergi hægt að útiloka slíka skúrir. Elísabet segir að það verði hlýtt á landinu, víða þrettán til 20 stiga hiti. Hlýjast verði sunnanlands og suðvestanlands.

„Það má segja að það viðri vel til útileguferða hvar sem er á landinu. Fólk ætti bara að fara þangað sem hugurinn leitar helst," segir Elísabet sem ætlar sjálf að vera í Reykjavík og standa veðurvaktina.

Ítarlega verður farið yfir verslunarmannahelgarveðrið í veðurfréttatíma á Stöð 2 þegar klukkan er 23 mínútur gengin í sjö.