Aftur orðið fært inn í Bása

Vegurinn inn í Bása er orðinn fær öllum jeppum en í gær og morgun flæddi Krossá eftir veginum með þeim afleiðingum að hann varð ófær.Að sögn Skúla Skúlasonar framkvæmdastjóra Útivistar var fengin grafa til beina ánni í rétta átt og nú í dag hafi vegurinn verið opnaður aftur. „Það var orðinn talsverður vatnsflaumur eftir veginum en okkur tókst að koma þessu í lag," segir Skúli.

Miklir vatnavextir hafa verið á þessu svæði um helgina. Vegurinn inn í Herðubreiðalindir lokaðist á sunnudag vestan við Jökulsá á Fjöllum vegna vatnavaxta í Lindaá. Og svo breytti Krossá farvegi sínum og lokaði leiðinni inn í Bása en með aðstoð vaskra gröfumanna er sú leið nú aftur opin.