Máttur Samtaka lánþega mikill

Í skriflegu svari FME til umboðsmanns Alþingis vegna fyrirspurnar umboðsmanns um lagalegan grundvöll tilmæla FME og Seðlabankans um uppgjör á gengistryggðum lánum segir að hættuástand hefði getað skapast í kjölfar tveggja yfirlýsinga sem Samtök lánþega sendu út hinn 23. og 26. júní síðastliðinn. Í þessum yfirlýsingum hvöttu samtökin almenning annars vegar til að hætta að greiða af lánum og hins vegar til að taka innstæður sínar úr bönkum.

Guðmundur Andri Skúlason, talsmaður Samtaka lánþega, segir að félagsmenn í Samtökunum séu núna á bilinu 2200-2300.

„Mikill er máttur samtakanna ef að þetta er raunin," segir Guðmundur Andri. Hann segir að Fjármálaeftirlitið og Seðlabankinn ættu heldur að skoða hver raunverulega ástæðan er bak við fjármálaóstöðugleikann en að einblína á einstakar yfirlýsingar. Hann segir tilmæli samtaka lánþega ekki óábyrg. „Við erum hagsmunasamtök fyrir lánþega og vinnum að hagsmunamálum þeirra."