Umboðsmaður skuldara í skuldasúpu

Runólfur Ágústsson nýráðinn umboðsmaður skuldara skildi eftir sig hálfan milljarð í eignarhaldsfélagi sem hann átti í aðdraganda hrunsins. Útlit er fyrir að Sparisjóður Keflavíkur og aðrir bankar þurfi að afskrifa skuldina þar sem félagið er eignalaust.

Þetta kemur fram í DV í dag. Blaðið greinir frá því að eignarhaldsfélagið Obduro sem var í eigu Runólfs Ágústssonar hafi fjárfest fyrir þrjú hundruð milljónir í hlutabréfum Iceabank árið 2007. Sparisjóður Keflavíkur hafi lánað félaginu fyrir hlutabréfakaupunum. Runólfur hafi svo fært félagið af sínu nafni í fyrrasumar yfir á lögmanninn Steinberg Finnbogason. Í ársreikningi félagsins fyrir 2008 kemur fram að Obduro hafi tapað rúmlega 610 milljónum króna á því ári og skuldir þess hafi numið tæplega 530 milljónum. Þá kemur einnig fram að rúmur helmingur af tapi Obduro sé vegna þrjú hundruð milljóna króna niðurfærslu á eignarhlutanum í Icebank. Samkvæmt heimildum fréttastofu hefur ekki verið tekin ákvörðun um hvort Sparisjóður Keflavíkur afskrifi skuld félagsins eða grípi til annarra aðgerða. Sparisjóðurinn stendur þó frammi fyrir því að þurfa ýmist að gera árangurslaust fjárnám í félaginu sem er eignalaust eða gefa það upp til gjaldþrotaskipta. Haft er eftir Runólfi í blaðinu að viðskiptin hafi verið eðlileg og ekkert ólöglegt hafi verið þarna á ferðinni. Nánar verður fjallað um málið í kvöldfréttum.