Herkúles vél nauðlenti á Keflavíkurflugvelli

Hætta skapaðist um borð í stórri bandarískri Herkúles herflutningavél, eftir að bilun kom upp í tveimur hreyflum af fjórum, þegar hún var stödd skammt frá Íslandi undir kvöld í gær.

Flugstjórinn ákvað að lenda á Keflavíkurflugvelli, þar sem vélin var þung lestuð, á leið til Afganistans, með fyrirhugaða viðkomu á Englandi.

Slökkvilið hafði viðbúnað á vellinum, en lendingin tókst vel á sjöunda tímanum í gærkvöldi. Þá var dautt á einum hreyfli og annar var á síðasta snúningi, að sögn Víkurfrétta. 20 hermenn voru um borð í vélinni.