„Við erum á varðbergi þessa dagana“

Hætta er talin á að eðjuflóð gætu komið ofan úr Eyjafjallajökli í dag en mikilli úrkomu er spáð á Suðurlandi. Lögregla er með aukin viðbúnað undir Eyjafjöllum og Veðurstofa Íslands fylgist náið með ástandi mála. „Við erum á varðbergi þessa dagana," segir jarðfræðingur hjá Veðurstofunni.

Samkvæmt upplýsingum frá Veðurstofunni er gert ráð fyrir mikilli úrkomu á Suðurlandi í dag og mun úrkomubelti fara yfir Eyjafjallajökul. Mikil aska er á jöklinum og samfara úrkomu eykst hætta á eðjuflóðum vatns og ösku í ánum sem renna frá jöklinum.

„Það sem höfum verið að óttast er að þetta mun að einhverju leyti fara á hreyfingu og það myndi skila sér niður í árnar og þar af leiðandi myndi einskonar eðjuflóð fara af stað en það fer í rauninni algjörlega eftir úrkomunni," segir Jón Kristinn Helgason, jarðfræðingur hjá veðurstofunni. Hann bendir á að um mikið úrkomusvæði sé að ræða.

Eyjafjallajökull og hlíðar hans eru á skilgreindu hættusvæði og er umferð um jökulinn og hlíðar hans bönnuð. Sérstaklega er varað við umferð um gilin. Vegfarendur um Suðurlandsveg og um veginn inn í Þórsmörk eru beðnir um að sýna aðgát. Lögreglan mun auka viðbúnað og Veðurstofan fylgist náið með ástandi mála.

Síðastliðinn föstudag var haldinn fundur í almannavarnanefnd á Hvolsvelli ásamt fulltrúum Veðurstofu Íslands og almannavarnadeildar Ríkislögreglustjóra. Þar var sérstaklega rætt um aukna hættu vegna eðjuflóða og viðbrögð vegna þeirra.