Dagsektir ef starfsmenn eru án vinnustaðaskírteina

Eftirleiðis skulu allir starfsmenn og atvinnurekendur í byggingariðnaði og veitingarekstri hafa vinnuskírteini á sér við störf sín. Alþingi samþykkti lög þess efnis í síðustu viku. Möguleiki er á að þetta eigi við fleiri atvinnugreinar.

Árni Páll Árnason félagsmálaráðherra var flutningsmaður frumvarpsins. Hann segir það nauðsynlegt til að tryggja réttindi starfsmanna og að lágmarksstarfskjör séu virt. Mýmörg dæmi séu um hið gagnstæða á undanförnum árum og lögin taki á því. Þá sé mikilvægt að hægt sé að ganga úr skugga um það með einföldum hætti, hvort verið sé að svíkja út atvinnuleysisbætur.

„Tvær leiðir voru færar í þessu; önnur var sú að fara í stórfellt opinbert eftirlit, en hana vildum við ekki fara. Hin var sú að aðilar vinnumarkaðarins sæju um þann þátt. Við getum ekki liðið það að réttindi séu brotin á erlendu launafólki eða menn geti stundað stórfelld svik í atvinnutryggingakerfinu og það séu engin úrræði við líði.“

Sigmundur Davíð Gunnlaugsson, formaður Framsóknarflokksins, gagnrýndi lögin harðlega í fréttum Ríkisútvarpsins í gær. Þar sagði hann málið óhugnanlegt og þegar það sé sett saman við ýmis konar boð og bönn minni samfélagið helst á Austur-Þýskaland.

Árni Páll segir gagnrýni Sigmundar athyglisverða. „Framsóknarflokkurinn gerði aldrei athugasemdir við málið meðan það var til meðferðar í þinginu, hann virðist hafa haft einhverjum öðrum hnöppum að hneppa.“

Margrét Steinarsdóttir, framkvæmdastjóri Mannréttindaskrifstofu Íslands, segist ekki hafa séð frumvarpið. Það hafi ekki verið sent skrifstofunni til umsagnar.

Hún segir mikilvægast að huga að því að varlega sé farið í skráningu og söfnun persónuupplýsinga, í tengslum við útgáfu slíkra skírteina. Þá verði að tryggja að þau séu ekki notuð í öðrum tilgangi.

„Mér sýnist þetta snúa að vinnuveitandanum og að hann fari eftir lögum. Ég á því erfitt með að sjá mannréttindavinkil á þessu, fyrirtæki sem slík geta ekki notið mannréttinda.“kolbeinn@frettabladid.is