Steini fjall selur gosmyndir um allan heim

Myndir ljósmyndarans Sigursteins Baldurs­sonar, eða Steina fjalls eins og hann kallar sig, af eldstöðvunum við Fimmvörðuháls hafa birst í heimsfjölmiðlum á borð við CNN og The Guardian auk fjölda dagblaða í Kína, Indlandi og víðar.

Sigursteinn hefur unnið að uppsetningu ferðavefsins Planeticeland undanfarin ár en þar geta áhugasamir ferðast um landið með því að skoða myndir sem teknar eru á fimmtán kílómetra fresti og sýna landslag og staði í 360 gráða vinkli.

„Þetta er einn stærsti sýndarveruleiki í heimi og þarna getur fólk upplifað það að ferðast um landið á Netinu. Við neyðumst þó til að hætta með vefinn innan skamms því hvergi er fjármagn að finna. Í staðinn mun ég leggja aukna áherslu á landslagsmyndir auk þess sem ég er farinn að leggja drög að verkefni sem ég nefni Waiting For Katla," útskýrir Sigursteinn sem hyggst koma um tuttugu myndavélum fyrir á ýmsum stöðum í kringum Kötlu. Vélarnar munu taka myndir á tuttugu mínútna fresti og því ætti að nást mynd af gosinu ef af því verður.

„Mig langar að mynda Suðurlandið og svæðið í kringum jökulinn því gera má ráð fyrir því að þetta landsvæði verði fyrir miklum breytingum á næstunni. Mig langar með þessum hætti að búa til minnismerki um þá atburði sem hafa átt sér stað."

Áhugasömum er bent á aðdáendasíðu Steina Fjalls á Facebook. - sm