Birta vill afsökunarbeiðni frá rektor LHÍ

Fatahönnuðurinn Birta Björnsdóttir hefur sent rektor Listaháskóla Íslands bréf þar sem hún krefst þess að hann biðji hana afsökunar á viðbrögðum Lindu Bjarkar Árnadóttur, fagstjóra fatahönnunardeildar skólans. Þetta kom fram á vefsíðunni Miðjan.is.

Ástæðan er frétt Fréttablaðsins sem birtist í vikunni en þar gagnrýndi Linda kjóla sem sjónvarpskonurnar Eva María og Ragnhildur Steinunn klæddust þegar þær kynntu Júróvisjón.

Bréfið sem Linda sendi Evu Maríu var svohljóðandi: „Sæl.Þið stöllur voruð í einhverjum ljóstustu kjólum sem ég hef séð í kvöld í sjónvarpinu.Þið hjá RUV eigið berið þá ábyrgð að sýna ávalt það sem er best í menningu, hönnun og listum.Ykkur tókst í kvöld að upphefja eitthvað það versta sem er að gerast í fatahönnun á Íslandiog sýna stórkostlegan skort á fagmennsku og það ekki í fyrsta skipti.þetta myndi ekki gerast hjá BBC.Kveðja.Linda Björg Árnadóttir.Fagstjóri í fatahönnun við LHÍ."

Í niðurlagi bréfsins segir Birta orðrétt: „Væri eðlilegt að fagstjóri leiklistardeildar Listaháskólans gagnrýndi Jón Gnarr og RÚV fyrir leik hans í áramótaskaupinu með orðunum „mér þykir leikur hans lélegur", og eins um leik Péturs Jóhanns í Fangavaktinni með orðunum „einhvað það versta sem er að gerast í leiklist". Báðir þessir leikarar eru ófaglærðir en þrátt fyrir það einir ástsælustu leikarar þjóðarinnar. Að sjálfsögðu eru fagstjóri leiklistardeildarinnar og fagstjórar annarra deilda innan skólans meiri fagmenn en það.

Þar sem mér, Birtu Björnsdóttur, þykir hafa verið brotið gróflega á mér af hendi Listaháskólans og starfsfólks hans og hönnun mín nídd á óréttlátan hátt í fjölmiðlum, fer ég tafarlaust fram á formlega afsökunarbeiðni að hálfu skólans."

Hægt er að lesa bréfið í heild hér fyrir neðan.