Fundu fíkniefni í bílum í Borgarnesi

Lögreglan í Borgarnesi hefur tekið lítilræði af fíkniefnum í dag. Samkvæmt upplýsingum frá lögreglunni er það aðallega kannabis sem hefur fundist. Efnin hafa fundist við eftirlit þar sem bílar eru stoppaðir og fíkniefnahundur látinn þefa af farangri bifreiðarinnar. Kannabisið hefur aðallega fundist hjá ungu fólki.

Mikil umferð er í gegnum Borgarnes þessa stundina. Búist er við að umferðin verði enn þyngri á morgun. Þá segir Lögreglan á Selfossi að allt hafi farið vel fram í umdæminu en mikil umferð hefur verið í dag. Búist við því að hún haldi áfram þangað til Herjólfur fer sína síðustu ferð í kvöld um hálf ellefu.

Einn var tekinn fyrir of hraðan akstur í umdæmi Lögreglunnar á Ísafirði í dag. Hann keyrði á 118 kílómetra hraða þar sem hámarkshraði er 90. Umferðin til Ísafjarðar er ekki hafin að sögn varðstjóra en hátíðin Mýrarbolti fer fram um helgina.

Lögreglan biðlar til ökumanna að keyra varlega og halda hraðanum niðri. Þá gangi allt mikið betur.