Eldgosið hægði á sölunni

Kimi Records heldur upp á þriggja ára afmælið sitt í Havaríi um helgina. Útgáfustjórinn Baldvin Esra segir fyrirtækið í góðum gír eftir dýfu í byrjun ársins vegna eldgossins í Eyjafjallajökli.

Kimi Records heldur upp á þriggja ára afmælið sitt um helgina með veislu í versluninni Havaríi. Útgáfufyrirtækið hefur verið starfandi síðan haustið 2007 og gefið út jaðartónlist af ýmsum stærðum og gerðum.

Baldvin Esra Einarsson stofnaði Kimi Records og er núverandi útgáfustjóri. „Þetta hefur verið talsvert ævintýri og verið upp og ofan eins og gengur og gerist í þessum bransa,“ segir Baldvin Esra um árin þrjú. „En við erum komin á ágætis kjöl aftur og við erum að gefa út talsvert af plötum fyrir jólin.“

Hann segir að reksturinn hafi verið erfiður fyrri hluta þessa árs. „Salan var mjög slök sem má rekja til fækkunar útlendinga í apríl og maí út af eldgosinu. Það setti strik í reikninginn en við erum að reyna að vinna okkur upp úr því. Seinni hluti sumars var mjög góður og við erum bjartsýnir á framhaldið.“

Baldvin segist ekkert hafa vitað út í hvað hann var að fara þegar hann byrjaði með fyrirtækið en segist hafa skemmt sér vel og lært heilmikið. Hann er núna búsettur í Belgíu og stjórnar þaðan erlendu útgáfunni en Kimi Records hefur gefið út níu plötur í Evrópu og Bandaríkjunum. „Þetta er allt öðruvísi ferli en heima. Það er miklu lengra og meiri undirbúningur sem þarf því við erum með svo mörg markaðssvæði og tungumál. En það er gaman líka að standa í því.“

Söluhæsta plata Kimi Records til þessa er Sleepdrunk Seasons, fyrsta plata Hjaltalín, sem hefur selst í um 7-8 þúsund eintökum. Þar á eftir kemur fyrsta plata FM Belfast, How to Make Friends, sem hefur selst í um 6-7 þúsund eintökum hér heima og erlendis. Á næstu dögum eru síðan tvær plötur væntanlegar frá Kimi, eða fyrsta plata Swords of Chaos og endurútgáfa af plötu SH draums, Goð. Sú síðarnefnda verður í tvöfaldri viðhafnarútgáfu með tónleikaupptökum og fleiru.

Afmælið í Havaríi stendur yfir frá 14 til 17 á laugardag þar sem hljómsveitirnar Reykjavík!, Morðingjarnir og Nolo leika fyrir gesti. Efnt verður til útsölu í tilefni afmælisins sem stendur yfir dagana 10., 11., 17. og 18. septem-ber. Geisladiskar, vínylplötur, stuttermabolir og fleira verður í boði á góðu verði.

freyr@frettabladid.is