Flugraskanir þrátt fyrir gosleysi

Þótt gosinu í Eyjafjallajökli sé lokið halda raskanir á flugi áfram í Bretlandi því á miðnætti lögðu flugliðar British Airways niður vinnu.

Viðræðum verkalýðsfélags þeirra og flugfélagsins lauk í gærkvöldi í fússi og hafa þeir boðað fimm sólarhringa verkfall. Flugliðar hafa deilt lengi og krefjast meira atvinnuöryggis og hærri launa. Viðsemjendur fugliða gengu af fundi í gærkvöldi en áður höfðu menn gert sér vonir um að samningar næðust á síðustu metrunum.

Í yfirlýsingu sem British Airways sendi frá sér í morgun kemur fram að þeir geri ráð fyrir að geta sinnt um 60% af lengri leiðum og um 50% af styttri leiðum til og frá Heathrow flugvelli, á meðan óvissuástand ríkir.

Þá segir ennfremur að tafir verði á flugi til og frá Gatwick flugvelli. Forsvarsmenn flugfélagsins eru ósáttir með verkalýðsfélagið sem þeir segja frekar vilja leysa deiluna í gegnum fjölmiðla en við samningaborðið.