Ferðalangar á þjóðhátíð þurfa enn að bíða

Allt flug frá Reykjavíkurflugvelli stöðvaðist í morgun og var flugvellinum lokað um tíma sökum þoku í borginni. Ein flugvél fór til Ísafjarðar klukkan átta og ein vél til Akureyrar klukkan tíu. Öllu flugi til Vestmannaeyja var frestað sem og flugi til Egilsstaða.

Samkvæmt upplýsingum frá Flugfélagi Íslands er að létta til yfir höfuðborginni og búist er við að vélar til Grænlands og Akureyrar fari í loftið klukkan tólf. Þá fer ein vél til Egilsstaða klukkan 12:45.

Enn er þó bið á flugi til Vestmannaeyja. Ekkert hefur verið flogið þangað í morgun en næsta athugun fer fram klukkan tvö. Þrjár fullar vélar bíða eftir að komast til Eyja.