Ekkert svigrúm fyrir frekari niðurskurð

Tryggingastofnun mun líklega hafa fjárhagslega burði til að taka á sig aukin fjárútgjöld vegna skerðingar á lífeyrisgreiðslum frá flestum stærstu lífeyrissjóðunum án aukaframlags úr ríkissjóði, segir Árni Páll Árnason, félags- og tryggingamálaráðherra.

„Þetta er auðvitað áfall, og undirstrikar að það er ekkert svigrúm í almannatryggingakerfinu fyrir frekari niðurskurð,“ segir Árni. Eins og fram kom í Fréttablaðinu í gær má telja víst að flestir almennu lífeyrissjóðirnir skerði lífeyrisgreiðslur á einhvern hátt á næstunni sökum slæmrar afkomu sjóðanna. Skerðingin verður misjafnlega mikil eftir sjóðum.

Þegar lífeyrisgreiðslur frá lífeyrissjóðunum skerðast hækka um leið lífeyrisgreiðslur frá almenna tryggingarkerfinu, þó hækkunin þar nái ekki að vega upp alla lækkunina sem verður á tekjum fólks.

Erfitt er að reikna út kostnaðarauka Tryggingastofnunar vegna þessa, en Árni Páll segir að svartsýnustu áætlanir geri ráð fyrir 1.600 milljóna króna kostnaðarauka á ári. Það myndi þýða um 800 milljóna króna kostnaðarauka það sem eftir er af árinu 2010.

Árni Páll segir vel mögulegt að aukin útgjöld Tryggingastofnunar vegna þessa rúmist innan fjárheimilda stofnunarinnar í ár. Það fari þó eftir forsendum í útreikningum á áhrifum skerðinga lífeyrissjóðanna.

Spurður hvort ástæða sé til að kalla eftir sérstakri rannsókn á framgöngu lífeyrissjóðanna og stjórnenda þeirra í aðdraganda hrunsins segir Árni Páll sjálfsagt að endurmeta framgöngu lífeyrissjóðanna með sama hætti og annarra. Hann hafi þó engar forsendur til að kalla eftir sérstakri rannsókn á sjóðunum.brjann@frettabladid.is