„Vegir manna á RÚV órannsakanlegir“

„Það er búið að tilkynna mér að það verður ekki framlengdur samningur við mig sem rennur út í lok ágúst," segir Kristinn Hrafnsson fréttamaður á Ríkisútvarpinu. Hann er nú staddur út í London að vinna að málum tengdum Wikileaks en það var í morgun sem honum var tilkynnt að samningurinn yrði ekki framlengdur.

„Ég hef ekki fengið neinar skýringar en á væntanlega eftir að fá einhver bréf um þetta." Kristinn hefur fjallað mikið um mál tengd Wikileaks og tók meðal annars þátt í því, í samstarfi við RÚV, að birta myndband sem sýnir árásir Bandaríkjahers í Bagdad í apríl síðastliðnum. Aðspurður hvort að mál tengd Wikileaks séu ástæður þess að samningurinn sé ekki endurnýjaður segir Kristinn: „Ég hef ekki hugmynd um það, það gæti verið að það fari fyrir brjóstið á RÚV að samþætta fjölmiðil við Wikileaks. Vegir manna á RÚV eru órannsakanlegir og ef til vill finnst þeim það óþægilegt að það sé verið að lyfta orðspori RÚV á einhvern stall."

Hann segir símtalið í morgun ekki hafa komið sér á óvart. „Það kemur mér ekkert á óvart lengur sem við kemur íslenskum blaðamannaheimi. Það er búið að segja upp 20 til 30 prósent af blaðamönnum síðan í hruninu. Það virðist vera lítill áhugi að viðhalda öflugri blaðamennsku, að minnsta kosti eins og það birtist."

Kristinn segir að framtíðin beri svo í skauti sér hvað tekur við. „Ég er svo sem nú þegar kominn með ýmis verkefni. Ég er hérna út í London til að taka þátt í þessari sprengju sem var að falla," segir Kristinn að lokum og á þar við nýjustu birtingu Wikileaks.