Lærbraut fjögurra vikna gamlan son sinn

Kona hefur verið dæmd í þriggja mánaða skilorðsbundið fangelsi fyrir alvarlega líkamsárás gegn fjögurra vikna gömlum syni sínum. Sannað þykir að konan, sem er talsvert misþroska, hafi lærbrotið son sinn. Óútskýrðir áverkar fundust einnig á eins árs gamallri dóttur konunnar.

Í nóvember í fyrra kom konan með son sinn, fjögurra vikna gamlan, á slysadeild landsspítalans. Hann reyndist með lærleggsbrotinn. Skýringar konunnar á orsökum áverkanna þóttu ótrúverðugar og lögregla var beðinn um að rannsaka málið.

Sérfræðingar voru kallaðir til að meta líklegar orsakir og niðurstaða þeirra var að snúið hefði verið uppá og togað í, eða með öðrum hætti, tekið harkalega á hægri fæti drengsins með þeim afleiðingum að hann lærleggsbrotnaði.

Móðirin er misþroska og greindarskert. Hún á eitt barn til viðbótar, dóttur, en Barnavernd hafði áður borist tilkynning vegna óútskýrðra brota á handleggjum hennar þegar hún var eins árs.

Þá var sonurinn einnig sendur í nánari rannsóknir þremur vikum eftir umrætt atvik og greindist þá með alvarlega áverka á hægri lærlegg og vinstri sköflungi.

Bæði þessi börn hafa nú verið tekin úr umsjá móður sinnar.

Niðurstaða fjölskipaðs hérðasdóms er að um alvarlegt brot sé að ræða Móðirin hafi brugðist gróflega forsjár- og umönnunarskyldum sínum gagnvart syni sínum. En á móti var litið til fyrirliggjandi gagna um að konan hafi þurft að stríða við mjög mikla og langvarandi erfiðleika í æsku sem markað hafi hana fyrir lífstíð.

Þá var einnig litið til misþroska hennar og greindarskerðingar við ákvörðun refsingar sem er sem fyrr segir þriggja mánaða skilorðsbundið fangelsi.