Verð alfarið í höndum verslana

Verð á kartöflum hefur tekið miklum breytingum á síðustu árum og vart haldist stöðugt í einn mánuð í senn. Samkvæmt upplýsingum frá Hagstofunni hefur vísitala neysluverðs haldist nokkuð jöfn á undanförnum 15 árum, þótt hún hafi hækkað um tæp fimmtíu prósentustig síðan í desember 2007.

Verð á kartöflum fylgir vísitölu neysluverðs upp að einhverju marki, en þó ekki meira en svo að það fer úr 132 krónum á kílóið í maí 2008 upp í 242 krónur á kílóið í ágúst sama ár. Þetta er um 83 prósenta hækkun á tæpum þremur mánuðum.

Bergvin Jóhannsson, kartöflubóndi á Áshóli í Eyjafjarðarsveit og formaður Félags kartöflubænda, segir að sumarmarkaðsverð á kartöflum ráðist algjörlega af framboði og því sé ekki mikið að marka tölurnar yfir þá mánuði.

„Uppskeran kemur á markað í júlí og ágúst og álagning í verslunum er það sem ræður verðinu,“ segir Bergvin. „Það skiptir engu máli hvernig verðið er frá bónda. Þessar hækkanir og lækkanir eru allar í höndum verslananna.“ Bergvin segir bændur vera fyrst núna að komast aftur í það verð sem tíðkaðist fyrir um 20 árum. „Það eru auðvitað góðar fréttir fyrir okkur,“ segir hann. - sv