Þúsundir á Dalvík

Þúsundir manna eru nú á Dalvík enda er fiskidagurinn haldinn hátíðlegur þar í dag. Lögreglumaður á Dalvík sem Vísir talaði við segir að allt gangi samkvæmt áætlun og engin óvænt tilvik komið upp samkvæmt sinni vitund.

Lögreglan segir að fólk hafi beðið fiskidagsins með eftirvæntingu enda voru öll tjaldstæði í bænum orðin full um síðustu helgi og hafa verið þétt setin síðan.

Í gærkvöldi buðu heimamenn gestum og gangandi upp á fiskisúpu og má búast við því að hundruð lítra af súpu hafi  runnið niður kverkar súpuþyrstra fiskiunnenda.