Greiðslur til bænda lækka - en samt ekki

Sláturfélag Suðurlands ætlar að lækka greiðslur til sauðfjárbænda um 39 krónur á kílóið að jafnaði fyrir dilka. Kristján Ólafsson, bóndi í Seljalandi, sagði í samtali við fréttastofu í morgun að þetta geti gengið af sauðfjárbændum dauðum. Greiðslur til sauðfjárbænda eiga þó ekki að lækka, því þeir fá þær eftir öðrum leiðum.

Um 700 bændur leggja inn sauðfjárafurðir hjá sláturfélaginu, á Suður- og Vesturlandi, að jafnaði 9.000 tonn hver. Ætla má því að lækkun á greiðslum frá Sláturfélaginu nemi því að jafnaði um 320 þúsund krónum.

Steinþór Skúlason, forstjóri Sláturfélagsins segir það vera misskiling að greiðslur til bænda lækki. Bændurnir fái sömu upphæð en eftir öðrum leiðum.

Sláturleyfishafar hafi fengið greiðslur frá Bændasamtökunum, svonefnd vaxta- og geymslugjald. Þessir fjármunir fari nú beint til bænda, en ekki í gegnum afurðaverð hjá sláturleyfishöfum.

Sindri Sigurgeirsson, formaður Landssamtaka sauðfjárbænda, tekur undir með Steinþór. Hann bendir samt sem áður á að þar sem greiðslur hækki ekki, verði bændur fyrir kjaraskerðingu vegna verðbólgunnar.