LÍÚ: Ísland í fullum rétti til að veiða makríl

Svo segir m.a. í stuttri yfirlýsingu, sem Landssamband íslenskra útvegsmanna hefur sent frá sér til erlendra miðla í kjölfar fréttatilkynningar nokkurra samtaka í sjávarútvegi í Noregi og innan Evrópusambandsins, þar sem makrílveiðar Íslendinga voru sagðar óábyrgar. Yfirlýsingunni fylgdi minnisblað um makrílveiðar.

Fjallað er um málið á vefsíðu LÍÚ og þar má lesa minnisblaðið í heild. Yfirlýsingin hljóðar svo:

„Í fréttatilkynningu frá 4. ágúst sl. er því lýst yfir að makrílveiðar Íslendinga innan íslensku efnahagslögsögunnar séu óábyrgar. Að baki tilkynningunni standa European Association of Fish Producers Organisations, Norwegian Fishermen's Association, Norwegian Seafood Federation, Norges Fiskarlag og Fiskeri- og havbruksnæringens landsforening í Noregi. Þessar ásakanir eru með öllu rakalausar. Makrílveiðar Íslendingar eru í senn lögmætar og ábyrgar.

Ísland er í í fullum rétti til að veiða makríl innan íslenslu efnahagslögsögunnar, rétt eins og Norðmenn og aðildarríki Evrópusambandsins hafa rétt til makrílveiða innan sinna eigin efnahagslögsagna. Makrílveiðar Íslendinga eru því jafnlögmætar og makrílveiðar Noregs og Evrópusambandsríkjanna."