Breyttu texta fyrir myndband

Myndband hljómsveitarinnar Hitakúts við lagið Gefið mig allan af plötunni Ástin Míní er komið í spilun, bæði á Netinu og í sjónvarpinu. Þar er sögð saga tveggja einstaklinga á dramatískan hátt og til þess að sagan passaði betur við lagið var uppröðun textans breytt. „Hugmyndin að laginu var allt önnur í rauninni,“ segir Sigurjón Unnar Sveinsson, Hitakútur. „Svo ákváðum við að gera vídeó og þá sá ég fyrir mér þessa sögu. Til þess að þetta myndi ganga upp þurftum við að svissa versi tvö og þrjú. Þá féll textinn algjörlega inn í þessa sögu.“

Hitakútur, sem er ættaður frá Selfossi og Hveragerði, ákvað að tjalda öllu til við gerð myndbandsins. Fengu þeir til liðs við sig Önnu Guðnýju Guðmundsdóttur myndatökumann og leikkonuna Hildi Jakobínu Tryggvadóttur, auk þess sem sveitin naut aðstoðar slökkviliðs Hveragerðis og björgunarsveitarinnar í Hveragerði. „Ég vil þakka slökkviliðinu og björgunarsveitinni. Þetta hefði ekki gengið svona flott án þeirra. Það var líka sérstaklega gott að hafa fengið þessar stelpur með í þetta,“ segir Sigurjón, en þær stunda báðar nám í Kvikmyndaskóla Íslands. Spurður hvort uppátækið hafi ekki kostað sitt, segir hann: „Nei, þetta var bara helmingurinn af upphaflegri kostnaðaráætlun.“ - fb