Höfðar mál gegn Ríkisskattstjóra

Bjarki Diego, fyrrverandi framkvæmdastjóri hjá Kaupþingi, hefur höfðað mál gegn Ríkisskattstjóra fyrir héraðsdómi og krafist ógildingar á úrskurði embættisins vegna söluréttasamninga. Hann telur Ríkiskattstjóra vanhæfan þar sem greinaskrif í blaði embættisins sýni dylgjur og fyrirlitningu á bankamönnum. Ríkisskattstjóri vísar slíkum ávirðingum á bug.

Fyrrverandi stjórnendur Glitnis og Kaupþings fengu margir hverjir bakreikning frá skattyfirvöldum fyrr í sumar vegna söluréttasamninga. Hæstu fjárhæðirnar voru hjá Kaupþingi en dæmi eru um að menn hafi hagnast um allt að fimm hundruð milljónir króna.

Skattyfirvöld kröfðust þess að samningarnir verði skattlagðir sem launatekjur en ekki fjármagnstekjur, þ.e. að meta eigi undirliggjandi ráðstafanir sem sölurétturinn tryggir sem kaupréttartekjur.

Ríkisskattstjóri hefur þegar unnið sambærilegt mál gegn Þórði Má Jóhannessyni, fyrrverandi forstjóra Straums, fyrir yfirskattanefnd og héraðsdómi.

Bjarki Diego, lögmaður og fyrrverandi framkvæmdastjóri hjá Kaupþingi, er einn þeirra stjórnenda sem fengið hefur úrskurð frá Ríkiskattstjóra vegna söluréttasamnings. Bjarki hefur höfðað mál gegn Ríkiskattstjóra og krefst þess að úrskurðurinn verði felldur úr gildi.

Málsástæður eru flestar lagalegs eðlis, s.s. að skattlagningin eigi ekki rétt á sér þar sem tekjur voru engar því Bjarki nýtti aldrei söluréttinn. Að auki er því haldið fram að Ríkiskattstjóri sé vanhæfur til að úrskurða í málinu vegna þeirra dylgna og fyrirlitningar á bankamönnum sem birst hafa í greinaskrifum í Tíund, fréttablaði Ríkisskattstjóra. Búið er að þingfesta málið og hefur ríkislögmaður frest til 10. Ágúst til að koma með andmæli.

Bjarki Diego, vildi ekki tjá sig um málið við fréttastofu en staðfesti þó að hann hefði höfðað málið. Skúli Eggert Þórðarson, Ríkisskattstjóri, vísar því á bug að um dylgjur sé um að ræða í garð bankamanna, aðeins hafi verið sagt frá staðreyndum og þær séu að íslenskar fjármálastofnanir hafi reynt allt hvað þær gátu til að koma í veg fyrir að skattyfirvöld fengju nauðsynlegar upplýsingar. Frá hefur þessu hafi verið greint í Tíund og víðar.