Siv vill íslenska fánann lengur við hún

Siv Friðleifsdóttir alþingismaður vill að veitt verði rýmri heimild til þess að nota íslenska fánann þannig að hann megi blakta lengur við hún. Siv lagði fram þingsályktunartillögu þess efnis á Alþingi í dag að forsætisráðherra skoði málið.

Hún leggur til að veitt verði það svigrúm að hafa megi fánann uppi allan sólarhringinn yfir bjartasta tímann á sumrin, frá 15. maí til 15. ágúst. Hluta þess tímabils sé sólsetur eftir miðnætti og sólarupprás skömmu síðar. „Vera má að í framtíðinni verði grundvöllur fyrir því að afnema með öllu hömlur á því hvenær fáninn megi vera uppi, þ.e. að hann megi þá vera á stöng allan sólarhringinn allan ársins hring," segir Siv í greinagerð með tillögunni.

Siv telur hins vegar eðlilegt að eitt skref verði tekið í einu og reynslan síðan látin skera úr um hvort frekari skref verði tekin. Rétt sé að byrja á því að heimila að fáninn sé uppi allan sólarhringinn á sumrin.