Hin mörgu andlit Christinu Aguilera

Bandaríska söngkonan Christina Aguilera, reynir að hressa rækilega upp á ímyndina á sinni fjórðu hljóðversplötu, Bionic, sem er nýkomin út.

Síðasta plata Christinu Aguilera, Back To Basic, fékk ágætis dóma hjá gagnrýnendum og er til að mynda hæst allra platna hennar í einkunn á síðunni Metacritic.com. Þar söng hún sálar-, djass- og blúslög í anda þeirra tónlistarmanna sem höfðu áhrif á hana í æsku. Platan seldist þó ekki nægilega vel, sérstaklega í heimalandinu og í Kanada þar sem einungis 1,7 milljónir eintaka fóru yfir búðarborðið. Það er lítið á mælikvarða Aguilera því fyrsta plata hennar seldist í tæplega 8,2 milljónum eintaka.

Fallið er því hátt á rétt innan við tíu árum. Þó verður að taka með í reikninginn almennt dvínandi plötusölu undanfarinna ára sökum ólöglegs niðurhals.

Á Bionic vendur Aguilera kvæði sínu í kross og syngur taktföst, nútímaleg lög þar sem hún nýtur aðstoðar vinsælla tónlistarmanna og lagahöfunda á borð við M.I.A, Le Tigre, Peaches og Switch. Linda Perry úr 4 Non Blondes, sem var upptökustjóri Back To Basic, og samdi lögin með Aguilera, fær aðeins að spreyta sig í einu lagi.

Myndbandið við fyrsta smáskífulagið Not Myself Tonight sýnir að söngkonan vill ekki vera neinn eftirbátur Lady Gaga sem hefur gnæft yfir poppdívu-markaðnum undanfarin ár.

Allt er gert út á ögrandi kynþokkann með smá skvettu af kvalalosta, svona rétt til að sýna að Aguilera getur þetta alveg líka. Breytingin sem hefur aftur á móti orðið frá plötu númer tvö, Stripped, er sú að klámáherslan með hálfnakinni söngkonunni dillandi sér uppi á sviði er ekki jafnmikil, enda fékk hún skömm í hattinn fyrir hegðun sína hjá siðapostulum vestanhafs.

Sjálf segist hún ekki vera að apa eftir Gaga. „Ég ætla að vera í þessu í langan tíma og eftir að hafa verið í áratug í bransanum hef ég ekkert að sanna lengur," segir hún.

„Við alla þá sem vilja vera neikvæðir vil ég segja að ég er greinilega nógu merkileg til að þeim sé ekki sama um mig."

Með nýju plötunni vill Aguilera túlka kvenleika sinn í öllum sínum myndum; sem móðir, eiginkona, söngkona og leikkona, en fyrsta mynd hennar, söngvamyndin Burlesque, kemur út síðar á árinu.

„Með Bionic vil ég sýna fram á þá ofurmannlegu eiginleika sem nútímakonur þurfa að búa yfir," segir hún og bætir við: „Ég hef þroskast, breyst og lært mjög mikið. Ég hef aldrei haft jafnmikið sjálfstraust og búið yfir eins miklu öryggi og eins miklum kynþokka og í dag."