Ekkert svigrúm til bjórhækkana

Heimsmarkaðsverð á byggi hefur tvöfaldast á síðustu mánuðum vegna uppskerubrests í Evrópu, líkt og verð á hveiti. Má því búast við því að verð á bjór muni hækka töluvert í kjölfarið hér á landi.

Ólafur Þröstur Ólafsson, eigandi Bruggsmiðjunnar á Árskógssandi, segir að hækkandi heimsmarkaðsverð muni vissulega hafa áhrif á bjórframleiðslu í landinu en ekki sé mikið svigrúm fyrir framleiðendur hér á landi til frekari verðhækkana. „Nóg er nú samt eftir þessar gífurlegu skattahækkanir undanfarið,“ segir Ólafur. „Ríkið tekur allt sem það getur til sín af arði áfengisframleiðslu. Það er á milli 60 og 70 prósent af útsöluverði bjórs sem fer til ríkisins.“

Gunnar B. Sigurgeirsson, framkvæmdastjóri markaðssviðs hjá Ölgerðinni, segir hækkanirnar vissulega vera áhyggjuefni en Ölgerðin hafi fasta samninga við erlenda birgja. „Þetta mun þó ná hingað fyrr eða síðar,“ segir Gunnar. „En það er ómögulegt að segja hversu mikil hækkun verður á útsöluverði.“ Ölgerðin er eini framleiðandinn hér á landi sem bruggar bjór að hluta til úr íslensku byggi og segir Gunnar það hjálpa fyrirtækinu að sporna við hækkunum ásamt styrkingu krónunnar. - sv