Nokkrir verið handteknir vegna morðsins í Hafnarfirði

Yfirheyrslur hafa staðið yfir í dag vegna morðsins í Hafnarfirði á sunnudag, samkvæmt upplýsingum frá Friðriki Smára Björgvinssyni, yfirlögregluþjóni frá lögreglunni á höfuðborgarsvæðinu.

Fjölmargir hafa verið yfirheyrðir frá því að lögregla fékk tilkynningu um andlát mannsins eftir hádegi á sunnudag. Friðrik Smári segir að flestir þeirra hafi komið sjálfir til yfirheyrslu. Hins vegar hafi þurft að handtaka nokkra til þess að hægt væri að yfirheyra þá. Með því hafi þeir fengið réttarstöðu grunaðs manns.

Einn maður hefur þurft að gista fangageymslur lögreglunnar yfir nótt vegna rannsóknar lögreglunnar, en sá maður var látinn laus um miðjan dag í gær, eins og komið hefur fram.