Kostar 14 dollara að ferðast án áritunar til BNA

Frá og með 8. september þurfa allir sem ferðast án áritunar til Bandaríkjanna að greiða gjald sem nemur 14 Bandaríkjadollurum (u.þ.b. 1.600 krónur) þegar þeir sækja um ESTA ferðaheimild.

ESTA, sem var tekið í gagnið árið 2009, er rafræn umsókn um ferðaheimild, sem þegnar þeirra landa sem taka þátt í verkefninu um undanþágur frá bandarískri ferðamannaáritun, þurfa að sækja um áður en þeir ferðast til Bandaríkjanna. Íslendingar hafa tekið þátt í verkefninu frá árinu 1986 og þurfa því ekki að greiða hið almenna umsóknargjald (140 Bandaríkjadollarar) fyrir ferðamannaáritun.

Sækja þarf um ESTA ferðaheimildina á vefslóðinni https://esta.cbp.dhs.gov og er umsóknareyðublaðið til í íslenskri þýðingu. Greiða þarf með kredit- eða debetkorti. Nánari upplýsingar um ESTA, ásamt leiðbeiningum varðandi útfyllingu umsóknar, er að finna á heimasíðu bandaríska sendiráðsins á Íslandi: https://iceland.usembassy.gov .

Ferðamenn sem fá ESTA ferðaheimild samþykkta fyrir 8. september 2010 þurfa ekki að fylla út nýja umsókn eftir að gjaldið tekur gildi. Ferðaheimild gildir í tvö ár frá samþykki, eða þar til vegabréf viðkomandi rennur út, hvort sem gerist fyrr. Umsækjendur skulu sækja um a.m.k. 72 klukkustundum áður en fyrirhugað ferðalag hefst.