Handteknir eftir bílveltu

Tveir menn af erlendu bergi brotnir voru handteknir vegna bílveltunnar við vatnsverndarsvæðið í Heiðmörk í dag.

Grunur leikur á að annar þeirra, ökumaður bílsins, hafi ekið undir áhrifum áfengis. Lögreglan býst við því að tekin verði skýrsla af mönnunum þegar rennur af þeim og þeim svo sleppt. Olía lak úr bílnum sem velti og var óttast að hún læki í vatnið. Um minniháttar magn af olíu var að ræða.

Samkvæmt upplýsingum Vísis var þriðji maðurinn, sem kom að bílveltunni, leiddur burtu í járnum, en Vísir hefur ekki fengið upplýsingar frá lögreglu um afdrif hans. Sá fullyrti við lögreglumenn á staðnum að mennirnir tveir sem voru í bílnum hafi krafist þess af sér að hann segði lögreglunni að hann hefði ekið bílnum.