Þarf stærra átak en eftir bankahrunið

Miklu skiptir að fara strax af stað með markaðsátak til að koma í veg fyrir mikinn samdrátt í fjölda ferðamanna sem koma hingað til lands, segir Erna Hauksdóttir, framkvæmdastjóri Samtaka ferðaþjónustunnar.

Farið var í slíkt átak eftir bankahrunið haustið 2008, en Erna segir þörf á enn stærra átaki nú. Að því verði íslensk stjórnvöld að koma, ásamt hagsmunaaðilum í ferðaþjónustu.

Ómögulegt er að segja til um hversu mikill samdráttur í tekjum af komu ferðamanna verður vegna eldgossins í Eyjafjallajökli, segir Erna. Gjaldeyristekjur af komu ferðamanna hingað til lands í fyrra voru um 155 milljarðar króna.

Margir hafa þegar afpantað ferðir hingað til lands, en Erna segir þrátt fyrir allt ákveðin tækifæri í gosinu. Þegar stöðugleiki komist á flugferðir til og frá landinu sé ekkert því til fyrirstöðu að ferðaþjónustan komist á flug.

Katrín Júlíusdóttir iðnaðarráðherra segir þegar unnið að kynningaráætlun til að draga úr afbókunum. Hún segir að starfshópur hafi raunar verið starfandi frá því fljótlega eftir að gos hófst í Eyjafjallajökli til að reyna að koma réttum upplýsingum á framfæri við erlenda fjölmiðla.

„Við erum líka að horfa inn á við. Það er verið að teikna upp sviðsmyndir svo við getum verið tilbúin við öllu í sumar. Ein sviðsmyndin er stórt gos, stærra eða sambærilegt en núverandi gos. Við viljum vita nákvæmlega til hvaða ráða skal gripið við slíkar aðstæður,“ segir Katrín.

„Það er engin leið að segja til um á þessari stundu hvort eða hversu mikil fækkun verður á ferðamönnum hér í sumar,“ segir Ólöf Ýrr Atladóttir ferðamálastjóri. „Þrátt fyrir að ástandið sé ekki gott í augnablikinu trúi ég því að okkur takist í sameiningu að tryggja að ferðaþjónustan beri ekki skaða af í sumar.“

Ólöf bendir á að eldgosið hafi vakið gríðarlega athygli og augu heimsins hafi beinst að Íslandi. Gosið gefi því líka tækifæri á því að kynna landið betur. Ótamið eðli landsins laði að sér ferðamenn, og svo lengi sem eldgos trufli ekki flugsamgöngur eigi áframhaldandi hraungos í Eyjafjallajökli ekki að þurfa að hafa slæm áhrif á komu ferðamanna hingað til lands. brjann@frettabladid.is

klemens@frettabladid.is