Loji með sólóplötu

Jaðarmerkið Brak er komið á fullt á öðru starfsári sínu og hefur þegar gefið út plötu með pönkbandinu Buxnaskjónum frá Akureyri. Önnur útgáfa ársins er sólóplata með Loga Höskuldssyni, eða Loja, eins og hann kallar sig.

Platan heitir „Skyndiskyssur" og eins og titillinn gefur til kynna inniheldur hún „skyssur" af lögum sem Loji hefur tekið upp í gegnum árin. Skissurnar eru 18 talsins og upptökurnar hráar. Loji klippir þær svo til og límir þær saman á ný í mörgum lögunum.

Logi vakti fyrst athygli með hljómsveitinni We Painted the Walls í Músiktilraunum fyrir sex árum. Nú spilar hann á gítar og syngur með hljómsveitinni Sudden Weather Change, sem sigraði í flokknum „Bjartasta vonin" á Íslensku tónlistarverðlaununum um síðustu helgi.

Glöggir hlustendur munu eflaust kannast við sum laganna, en textabrot af mörgum skissum hafa ratað í lög með Sudden Weather Change. Í tilefni af útgáfunni og nýrrar heimasíðu ætlar Brak að gefa ókeypis niðurhal af laginu „Blue Ray" með Loja. Finnið það á slóðinni www.brakrecords.com.- drg