Einkaþota Pauls Allen lenti á Reykjavíkurflugvelli

4. ágúst 2010 20:47

Einkaþota Pauls Allen, auðkýfings og eins stofnanda Microsoft, lenti á Reykjavíkurflugvelli í gærkvöldi. Octopus, risasnekkja í hans eigu, hefur legið við akkeri í ytri höfninni í Reykjavík síðustu daga. Um borð eru tveir kafbátar og tvær þyrlur.

Samkvæmt heimildum Vísis lenti einkaþota í hans eigu á Reykjavíkurflugvelli í gærkvöldi. Þar kom ein af þyrlunum, sem eru um borð á snekkjunni, að sækja farþega einkaþotunnar og flutti þá á snekkjuna sem er aðeins nokkrum hundruð metrum frá flugvellinum. Ekki liggur ljóst fyrir hvort að Paul Allen hafi verið um borð í þotunni.

Mikil leynd hefur hvílt yfir ferð snekkjunnar hér á landi. Hún er ein af stærstu snekkjum í heimi, 126 metrar á lengd . Vísir sagði meðal annars frá því að skipverjar um borð fóru að kafa í Silfru á Þingvöllum á dögunum.

Tengdar fréttir

Octopus, ein stærsta ofursnekkja heims siglir til Reykjavíkur

Glæsisnekkjan Octopus, eða Kolkrabbinn er lögð af stað áleiðis til Íslands og er væntanleg til Reykjavíkur á föstudag.

26. júlí 2010 11:08

Ætla að kafa niður að tveimur skipsflökum

Risasnekkjan Octopus, sem er í eigu auðjöfursins Pauls Allen, kom til landsins í gær og lá við akkeri í ytri höfninni í Reykjavík fram á kvöld. Þá stóð til að hún legðist við festar við Miðbakka. Ráðgert er að snekkjan verði hér í sex daga.

31. júlí 2010 08:00

Skipsverjar af Octopus kafa í Silfru

„Já, það eru tveir frá þeim sem eru hérna með okkur. En þetta er ekki Paul Allen sjálfur, bara einhverjir af áhöfninni,“ segir Tobías Klose hjá Dive.is sem er að fara kafa í Silfru með tveimur úr áhöfninni á risasnekkjunni Octopus, sem er í eigu auðjöfursins Pauls Allen. Snekkjan kom hingað til lands á fimmtudaginn og kom fram í fréttum að áhöfnin hafi kannað möguleika til að kafa á Þingvöllum.

1. ágúst 2010 17:40