Frægur gosflugstjóri heimsækir Ísland

Breski flugstjórinn Eric Moody, sem hlaut frægð er fyrir að bjarga Boeing 747 risaþotu úr eldfjallaösku á Indónesíu fyrir 28 árum, er væntanlegur til Íslands. Hann verður heiðursgestur alþjóðlegu flugráðstefnunnar, um Eyjafjallajökul og flugsamgöngur, sem fram fer á Vallarsvæðinu á Keflavíkurflugvelli síðar í vikunni.

Eric Moody var flugstjóri á British Airways-þotunni "City of Edinburgh" með 263 manns um borð þann 24. júní árið 1982 þegar hún flaug í gegnum öskuský frá eldfjallinu Galunggung á eynni Jövu. Flugvélin missti afl á öllum fjórum hreyflum og sveif þannig vélarlaus í átt til jarðar, án þess að áhöfnin áttaði sig á orsökinni.

Loftþrýstingur fór af farþegarýminu og súrefnisgrímur, sem sjálfkrafa féllu úr lofti vélarinnar, hjálpuðu farþegum að ná andanum. Flugmennirnir misstu einnig útsýni um framrúðurnar þar sem askan máði þær eins og sandpappír.

Yfirlýsing flugstjórans í hátalarakerfið, þegar hann reyndi að róa farþegana, þótti meistaraverk í að gera lítið úr hlutunum, en hann sagði: "Ladies and gentlemen, this is your captain speaking. We have a small problem. All four engines have stopped. We are doing our damnedest to get them under control. I trust you are not in too much distress."

Þotan var í 37 þúsund feta hæð þegar hreyflarnir stöðvuðust. Þotan sveif niður um 1.800 fet á mínútu og ákvað að flugstjórinn að freista þess að láta hana svífa í átt til flugvallarins í Jakarta. Hann efaðist hins vegar um að honum tækist að láta hana svífa yfir háan fjallgarð á leiðinni og hóf því undirbúning að nauðlendingu á Indlandshafi.

Áður en til þess kom hafði þotan svifið út úr öskuskýinu og tókst áhöfninni að ræsa þrjá hreyfla að nýju, um 16 mínútum eftir að drapst á þeim, og lenda síðan heilu og höldnu á flugvellinum í Jakarta. Lendingin þótti mikið afrek, ekki síst sökum þess að flugmennirnir sáu nær ekkert út um framrúðuna og aðflugshallargeisli virkaði ekki.

Flugstjórinn og áhöfn hans hlutu meðal annars heiðursviðurkenningu frá Bretadrottningu og fjallað hefur verið um atburðinn í sjónvarpsþáttaröð um flugslys á Fjölvarpinu.

Skráðir ráðstefnugestir eru 250 með 50 fyrirlesurum.