Gangnamaður fannst óhultur

Gangnamaður sem björgunarsveitir úr Skagafirði og Húnavatnssýslu leituðu í allan gærdag fannst um klukkan tíu í gær, heill á húfi. Maðurinn var við leitir við Hrossafell þegar hann fór á eftir hesti sem hann hafði misst frá sér. Samband náðist við hann klukkan níu um morguninn, hafði maðurinn þá náð hesti sínum og ætlaði hann að hitta félaga sína í Kambadal.

Ekkert spurðist síðan til mannsins fyrr en um kvöldið. Hann hafði gengið um 20 kílómetra niður að bænum Ketu á Skaga.

Yfir fimmtíu björgunar­sveitarmenn, þyrla og víðavangsleitarhundar tóku þátt í leitinni en veður til leitar var ekki gott.- jma