Starfsmenn í Laugarnesskóla vel vakandi

Ráðist var í mikla endurskipulagningu á gæslufyrirkomulagi á skólalóð Laugarnesskóla á síðasta ári, segir Sigríður Heiða Bragadóttir skólastjóri í samtali við Vísi.

Eins og fram hefur komið í fjölmiðlum leitaði lögreglan að manni í Laugardalshverfinu á föstudag sem grunaður er um að hafa sýnt börnum ósæmilega kynferðislega hegðun í hverfinu fyrr um kvöldið. Þótt atvikið hafi ekki gerst í beinum tengslum við skólastarf í Laugarnesskóla ákvað Vísir að spyrjast fyrir um það hvernig starfsmenn skólans væru búnir undir atvik af þessu tagi.

Sigríður Heiða segir að starfsmenn skólans séu alltaf mjög vel vakandi gagnvart tilfellum sem þessum. „Ef að einhver ókunnugur er eitthvað að slæðast á skólalóðinni að þá bregðast starfsmenn okkar við því," segir hún.

Sigríður Heiða bendir jafnframt á að það sé hluti af lífsleiknikennslunni í skólanum að taka upp umræðu um það hvernig eigi að bregðast við ókunnugum. Síðan er einn fastur liður í dagskánni hjá okkur sá að þriðji bekkur fær heimsókn frá Bláu áfram," segir Sigríður. Um er að ræða brúðuleikhús, þar sem börnum er meðal annars kennt að setja mörk í samskiptum við annað fólk.

Þá segir Sigríður Heiða að foreldrar séu duglegir við að brýna fyrir börnum sínum hvað sé rétt að gera í samskiptum við ókunnuga og hvað er rangt. Sigríður Heiða hefur ekki fengið símtöl frá foreldrum barna í Laugarnesskóla í dag vegna atviksins á föstudaginn.