Reykjavíkurborg hætti að niðurgreiða skólavist fyrir aðra

Borgarráð vill að að sveitarfélög verði skylduð til að greiða sama framlag með börnum sem sækja einkarekinn grunnskóla án tillits til þess hvar skólinn er staðsettur.

Eins og Vísir greindi frá nýlega greiðir Reykjavíkurborg hærra framlag með hverjum nemanda í einkareknum skólum sem staðsettir eru í Reykjavík en önnur sveitarfélög. Í Ísaksskóla nemur framlagið frá Reykjavík um 930 þúsundum króna á ári en framlög frá öðrum sveitarfélögum nema um 441 þúsund krónum. Þetta þýðir í raun að Reykjavíkurborg er að niðurgreiða skólavist fyrir börn úr öðrum sveitarfélögum því að öll börnin í skólanum fá sömu þjónustuna.

Dagur B. Eggertsson, formaður borgarráðs, sagði við Vísi í ágúst að sér þætti þessi mismunun afar óeðlileg og nú hefur borgarráð skorað á Samband íslenskra sveitarfélaga að beita sér fyrir því að settar verði reglur til að greiðslur með hverju barni verði jafnháar óháð staðsetningu grunnskólanna.