Dimma með þrjú lög á heiðursplötu Alice Cooper

Íslenska þungarokkssveitin Dimma á þrjú lög á ábreiðuplötu til heiðurs Alice Cooper sem kemur út 26. október næstkomandi. Tvö þeirra voru tekin upp á tónleikum Dimmu og Michaels Bruce, upprunalega gítarleikarans úr sveitinni, hér á landi 2002 en þriðja lagið var tekið sérstaklega upp með Dennis Dunaway, bassaleikaranum fræga, fyrir áðurnefnda plötu. Ingólfur Geirdal segir þetta vera sér mikið hjartans mál enda séu hann og bróðir hans, Silli sem einnig er meðlimur Dimmu, miklir Alice Cooper-aðdáendur.

„Við höfum unnið með bæði Michael og Dennis áður. Dennis samdi náttúrlega með okkur lag á síðustu Dimmu-plötu og við höfum verið í góðu sambandi við hann,“ segir Ingólfur en hann starfar sem töframaður í Svíþjóð og kemur meðal annars fram á ferju sem siglir milli Danmerkur og Svíþjóðar. Dimma hitaði jafnframt upp fyrir Alice Cooper þegar hann kom hingað til lands árið 2005. Þeim fannst lítið tiltökumál að henda í eitt ábreiðulag frá Cooper. „Við tókum upp okkar hluta hér á Íslandi og Dennis sinn í New York,“ segir Ingólfur og bætir því við að þeir hafi ekkert ráðist á garðinn þar sem hann var lægstur. „Lagið heitir Halo of Flies. Það er fremur kaflaskipt og yfir átta mínútur,“ útskýrir Ingólfur en Dimma er nú að undirbúa upptökur á næstu plötu. Þeir neyðast reyndar til að nýta hvern dauðann tíma því á meðan Ingólfur heillar sænska og danska ferjugesti upp úr skónum með töfrabrögðum er Silli á flakki um heiminn með Jónsa, oftast kenndum við Sigur Rós.

Hins vegar vill svo skemmtilega til að þetta er ekki fyrsta heiðurs-ábreiðuplatan sem Dimma tekur þátt í því fyrir skemmstu kom út ámóta plata til heiðurs Queen. Og aftur kom Dennis Dunaway við sögu. „Við gerðum okkar eigin útgáfu af We Will Rock You. Þessi útgáfa komst í hendurnar á Brian May og ég fékk síðan í sumar handskrifað bréf frá honum þar sem hann þakkaði mér kærlega vel fyrir þessa útgáfu, hún væri bara nokkuð góð.“

freyrgigja@frettabladid.is