Bjarni Ben: Gylfi getur ekki firrt sig ábyrgð

Formaður Sjálfstæðisflokksins segir að viðskiptaráðherra geti ekki firrt sig ábyrgð á því að ekki hafi verið gripið aðgerða vegna upplýsinga sem viðskiptaráðuneytið bjó yfir um ólögmæti gengistryggðra lána. Bjarni segir málið það alvarlegt að kalla verði Alþingi saman og þá telur hann að ríkisstjórnin eigi að víkja.

Fram hefur komið að í meira en ár hafi starfsmenn innan stjórnkerfisins búið yfir upplýsingum um ólögmæti gengistryggðra lána. Þá hefur verið fullyrt að Gylfi Magnússon, viðskiptaráðherra, hafi sagt Alþingi ósatt þegar hann sagðist ekki hafa aflað sér lögfræðiálits um lögmæti lánanna.

Bjarni gefur lítið fyrir þær útskýringar sem Gylfi hefur gefið undanfarna daga. „Útskýringar viðskiptaráðherra á því að það hafi legið fyrir lögfræðiálit en það hafi annað hvort engu máli skipt eða ráðherrann sjálfur hafi ekki af því vitað eru óskiljanlegar. Ráðherrann er ekki eitthvert eyland í viðskiptaráðuneytinu."

„Hversu mikið tap er þetta?"

Þá segir Bjarni mikilvægt að fram komi hvort að ríkisstjórnin með Steingrím J. Sigfússon, fjármálaráðherra, broddi fylkingar hafi ákveðið að taka ekki mið af umræddum upplýsingum þegar eignasöfn nýju bankanna voru metin. Hann vill einnig vita hvort að samningarnir hafi gert ráð fyrir að ef eignir gömlu bankanna yrðu meira virði þá ætti að koma viðbótargreiðsla en ef þær yrðu minni virði, eins allt stefni nú í, myndi það þýða tjón fyrir ríkið.

„Samdi fjármálaráðherra um að stofna Landsbankann og leggja honum til hlutafé á þessum forsendum vitandi af því að það væru miklar líkur til þess að eignir í bankanum yrði mun minna virði en út frá var gengið? Og hversu mikið tap er þetta?"

Staða Gylfa veik

Bjarni segir málið í heild sinni það alvarlegt að full tilefni sé til að kalla saman Alþingi og fá skýringar frá forystu ríkisstjórnarinnar.

Aðspurður hvort hann telji að Gylfi eigi að segja af sér sem viðskiptaráðherra segir Bjarni: „Viðskiptaráðherra hefur veitt algerlega ófullnægjandi skýringar og staða hans er í miklu uppnámi. Hann sækir sitt umboð til stjórnarmeirihlutans. Ég er þeirra skoðunar að öll ríkisstjórnin eigi að víkja. Þetta er bara enn eitt málið."