Traust Jóhönnu til Gylfa skilyrðum háð

Forsætisráðherra ber enn traust til viðskiptaráðherra, en traust hennar er því skilyrði háð að hann geti gefið greinargóðar skýringar á ásökunum sem settar hafa verið fram á hendur honum. Þingmenn Hreyfingarinnar ætla að leggja fram vantrauststillögu á hendur viðskiptaráðherra ef hann segir ekki af sér.

Staða Gylfa Magnússonar, efnahags- og viðskiptaráðherra, til að gegna ráðherraembætti hefur veikst mikið og hávær krafa er frá ákveðnum hluta þingflokks Vinstri grænna um breytingar á ríkisstjórninni, samkvæmt heimildum fréttastofu.

Gylfi nýtur enn trausts forsætisráðherra til að gegna embætti að því gefnu að hann geti gefið greinargóðar skýringar á hvaða upplýsingum og gögnum hann bjó yfir um ólögmæti gengistryggðra lána á síðasta ári, samkvæmt heimildum fréttastofu. Samkvæmt sömu heimildum hafa Jóhanna og Gylfi ekki rætt saman í dag, en Gylfi hefur verið á Hornströndum utan símasambands. Til stendur að þau ræði saman í kvöld eða á morgun.

Stjórnarþingmenn Vinstri grænna sem fréttastofa ræddi við sögðu í samtali við fréttastofu að mikilvægt væri að Gylfi gæfi betri skýringar á því sem hann vissi eða mátti vita. Einn þeirra sagði að það væri „bagalegt" ef gögn um ólögmæti gengistryggðra lána hafi verið til í ráðuneyti Gylfa og hann ekki vitað af þeim. Í þingflokki Vinstri grænna er hávær krafa um breytingar á ríkisstjórninni, en þó finnst nokkrum sem rætt var við óheppilegt að breytingarnar verði við þær aðstæður að Gylfi verði knúinn til afsagnar.

Þingmenn Hreyfingarinnar telja að Gylfi hafi afvegaleitt umræðuna um gengistryggð lán, leynt þing og þjóð mikilvægum gögnum og farið á svig við sannleikann.

„Okkur finnst að þessar upplýsingar hafi legið fyrir í efnahags- og viðskiptaráðuneytinu í stórum stíl og það sé bara mjög ótrúlegt að viðskiptaráðherra hafi ekki vitað af þessum lögfræðiálitum. Og ef hann vissi ekki af þeim, sem mér finnst mjög ólíklegt, þá er það engu að síður merki um að allt sé í klessu í ráðuneytinu og setur fram spurningamerki um veru hans þar áfram," segir Þór Saari, þingmaður Hreyfingarinnar.

En Gylfi svaraði fyrirspurn á Alþingi og talaði um erlend lán en gengistryggð lán voru dæmd ólögmæt sem er allt annar hlutur, ekki satt? „Það er mikill munur á því jú, en ég tel að hann hafi einfaldlega notað misvísandi orðalag viljandi í þeim tilgangi að afvegaleiða umræðuna. Hann er stjórnmálamaður líka þó hann sé hagfræðingur og fagmaður í ráðuneytinu og þetta eru þær aðferðir sem stjórnsýslan notar til þess að réttlæta gjörðir sínar," segir Þór.

Getum við gert þá kröfu til ráðherra að þeir viti um öll minnisblöð sem eru skrifuð og eru til í ráðuneytum þeirra? „Nei, vissulega getum við það kannski ekki, en minnisblað af þessu tagi skiptir efnahagslífið í heild sinni gríðarlegu máli, ríkissjóð gríðarlegu máli og stóran hluta almennings gríðarlegu máli. Það getur einfaldlega ekki verið annað en að ráðherrann hafi verið látinn vita af þessu, ég trúi ekki öðru," segir Þór.

Þingmenn Hreyfingarinnar ætla að leggja fram vantrauststillögu á hendur Gylfa þegar Alþingi kemur saman í haust ef hann segir ekki af sér áður. Fréttastofa reyndi ítrekað að ná tali af Gylfa í dag án árangurs.