Tvö hjól undir bílnum en áfram skröltir hann þó

Ölvaður ökumaður, sem lögreglan í Árnessýslu stöðvaði austan við Laugarvatn í gærkvöldi hefur verið búinn að aka svo lengi á öðru framdekkinu sprungnu, að það og felgan voru horfin og bremsuskálin var eydd upp til agna.

Þá var sprungið á öðru afturhjólinu og voru aðens slitrur af dekkinu eftir á felgunni. Það voru því ekki nema tvö virk hjól undir bílnum, en áfram skölti hann þó, enda fjórhjóladrifinn.

Maðurinn, sem var að koma frá Reykjavík, gaf þá skýringu á ferðum sínum að hann ætlaði að fara að renna fyrir lax í Hvítá, og var hann með tilheyrandi veiðigræjur í bílnum.