Biðröð eftir því að komast að áfenginu

Gert er ráð fyrir að um 40 þúsund manns komi í Vínbúðirnar í dag, segir Sigrún Ósk Sigurðardóttir, aðstoðarforstjóri ÁTVR, í samtali við Vísi. Hún segir að starfsemi Vínbúðanna hafi gengið vel í dag. „Ég sé á Heiðrúnu að þar hefur verið þétt traffík," segir Sigrún Ósk. Vísir hefur raunar þær upplýsingar úr versluninni Heiðrúnu á Stuðlahálsi að þar hafi verið biðröð fyrir utan þegar verslunin opnaði klukkan ellefu í morgun.

Sigrún segir að föstudagurinn fyrir verslunarmannahelgina sé jafnan einn mesti söludagur ársins í Vínbúðunum. Á vef ÁTVR kemur jafnframt fram að vikan fyrir verslunarmannahelgi er ein annasamasta vika ársins. Venjulega koma milli 125 - 127 þúsund viðskiptavinir í Vínbúðirnar þessa viku, sem er um 25-30% meira en vikuna á undan verslunarmannahelgarvikunni.

Í fyrra komu um 125 þúsund viðskiptavinir í Vínbúðirnar sem var um 2% færri en komu árið áður.