Risasnekkja Poul Allen leggst að bryggju í Reykjavík

Risasnekkja Poul Allens, annars stofnanda Microsoft, er nú komin inn á ytri höfnina í Reykjavík og leggst væntanlega að Miðbakkanum undir kvöld. Nokkur leynd hvílir fyir þessu ferðalagi.

Leiðangursmenn eru búnir að fá leyfi utanríkisráðuneytisins til að nota kafbáta skipsins hér við land, meðal annars til að skoða tiltekið skipsflak, en leynd hvílir enn yfir málinu.

Fornleifanefnd hefur verið gert viðvart og munu einhverjir íslenskir vísindamenn fylgjast með. Þá hefur Fréttastofan heimildir fyrir því að leiðangursmenn hafi kannað möguleika á köfun með kafbáti í Þingvallavatni, en þjóðgarðsverði er ekki kunnugt um nein leyfi til þess.

Ráðgert er að snekkjan verði hér í sex daga og heimildir herma að verslunarmannahelgin hafi verið valin sem komutími, til að draga athygli landsmanna sem mest frá leiðangrinum, enda flestir á faraldsfæti um helgina.

Auk tveggja kafbáta eru tvær þyrlur um borð, en skipið, sem er hátt í 50 metrum lengra en Herjólflur og talsvert breiðara, kostaði 25 milljarða króna í smíðum og það kostar tvo og hálfan milljarð króna á ári að gera það út.