Segir lækna ekki vera neitt hátekjufólk

Laun lækna sem birtust í tekjublaði Frjálsrar verslunar lýsa engan veginn raunveruleikanum hjá almennum læknum, að mati þeirra sem aðild eiga að Félagi almennra lækna. Vísir sagði frá því í gær að samkvæmt tekjublaði Frjálsrar verslunar voru 110 læknar með yfir milljón á mánuði í tekjur á síðasta ári.

„Það er satt að sérfræðingar eru með hærri heildarlaun heldur en meðalverkamaðurinn en það er margt sem er inni í laununum, bæði hjá sérfræðingum og almennum læknum," segir Hjörtur Haraldsson, kandídat í Félagi almennra lækna. Hann bendir á að bæði mikil menntun og vinna liggi að baki þeim tekjum sem læknar hafi. Engu að síður séu grunnlaun nýútskrifaðs kandídats, eftir sex ára háskólanám, um 303 þúsund krónur. „Grunnlaunin sjálf hækka alls ekki svo mikið næstu ár á eftir þrátt fyrir þó nokkra sérhæfingu og vinnu sem að baki liggur," segir Hjörtur.

Hjörtur bendir á að á meðan grunnlaunum sé haldið lágum sé reynt að halda yfirvinnulaunum háum í staðinn. „Það er kannski mögulegt að túlka þetta þannig að þetta hvetji til yfirvinnu og það eru kostir og gallar við það," segir Hjörtur, en ítrekar að sú staðreynd að 110 læknar séu með yfir milljón á mánuði varpi alls ekki réttu ljósi á stéttina. „Fólk á þessum lista er að öllum líkindum læknar sem eru í heilsugæslu út á landi, sem vinna sólarhringsvaktir marga daga í einu. Ég veit til dæmis að á Borgarnesi var læknir á sólarhringsvakt margar vikur vegna þess að það var enginn til að leysa af og þá náttúrlega safnast þetta upp," segir Hjörtur.

Hjörtur segir að margir unglæknar séu að sinna fjölskyldum sínum á grunnlaunum og því sé ekki rétt að útmála þá sem hátekjufólk.