Slökkviliðsmenn á Akureyri telja kjarasamning brotinn

Slökkviliðsmenn á Akureyri fá ekki greiddan frítökurétt né fá að taka hann út í fríum. Slíkt er brot á kjarasamningum og lögum frá árinu 1997, samkvæmt framkvæmdastjóra Landssambands slökkviliðs- og sjúkraflutningamanna (LSOS). Ítrekað hefur verið reynt að semja við bæinn að hálfu slökkviliðsmanna en ekkert þokast í málinu. Samkvæmt lögum á frítökuréttur að koma fram á launaseðlum starfsmanna en það hefur til þessa aldrei gerst.

Valdimar Leó Friðriksson, framkvæmdastjóri LSOS, segir Akureyrarbæ tvímælalaust bæði vera að brjóta lög og kjarasamninga .

„Þetta er eina sveitarfélagi,að því er ég best veit, þar sem þetta viðgengst," segir Valdimar. „Bærinn neitar algjörlega að greiða frítökuréttinn eða gefa mönnum það leyfi sem þeir eiga rétt á samkvæmt kjarasamningum. Þessi réttur fyrnist aldrei samkvæmt lögum þannig að það er í raun hægt að rukka hann inn hvenær sem er, en menn voru vissulega að vonast eftir því að þetta yrði gert að frumkvæði sveitarfélagsins."

Þorbjörn Haraldsson, slökkviliðsstjóri á Akureyri, segir málið vera byggt á misskilningi og samstarfið við Akureyrarbæ sé mjög gott. „Það er langt í frá að eitthvað bjáti þar á," segir hann. „Menn eru að fá allan frítökuréttinn sinn í formi fría og það kemur fram á launaseðlum."

Ólafur Stefánsson, slökkviliðsmaður og trúnaðarmaður slökkviliðsmanna á Akureyri, segir að menn hafi aldrei fengið frítökurétt og málið sé hið alvarlegasta.

„Það er búið að vera mikið karp um þetta undanfarin ár. Menn hafa verið hræddir við að fara í hart en nú á síðustu þremur árum hafa allir verið sammála um að vilja fá réttinn inn," segir hann. „Við höfum aldrei fengið þetta - hvorki greitt í launum né fríum."

Ólafur átti fund með starfsmannastjóra Akureyrarbæjar, Höllu Margréti Tryggvadóttur, í maí 2009. Ólafur segir að sátt hafi náðst á fundinum og ákveðið hafi verið að ganga í málið, en ekkert hefur verið að gert, þrátt fyrir ítrekanir.

Halla Margrét segir málið koma sér mikið á óvart og að hún hafi ekki fengið neinar ítrekanir varðandi málið.

„Ég er ekki með eitt einasta svona mál á borðinu hjá mér," segir hún. Spurð hvort slökkviliðsmenn á Akureyri séu að fá frítökurétt sinn eður ei, segist Halla ekki hafa næg gögn hjá sér til að geta staðfest það.

sunna@frettabladid.is